أنا فين؟
انا انسان عايش بيفكر.. موجود .. ولا ماليش كيان.. وانا مش انسان
فين زمنى ؟
فين وطنى؟
فين اهلى؟
فين معتقداتى؟
فين قرايبى وحبايبى؟
ممكن يكونوا معايا وانا اللى شايفة نفسى وحيدة؟
ولا انا فعلا لوحدى؟؟؟؟؟
فين احلى صفاتى ؟ وفين افعالى اللى بقدمها ..وفين ردودها؟
انا حاسة انى مجرد ذكرى.. ذكرى لنجاحات.. لاماكن زرتها..لناس عرفتها..مجرد ماضى ..
ماضى مش عارف يعيش الحاضر ولا حتى نفسه فى مستقبل
هو انا فعلا بقيت كده؟ ولا بس انا اللى مش عارفة اكون الحاضر وادور عالمستقبل؟
بس انا بحب الماضى ونفسى ارجع اعيش فيه .. عايزة ارجع طفله.. ايوة طفله بضفايرى وبسذاجتى وبحبى للحياة طفله مش شايله هموم ولا فى دماغها مستقبل ..طفله عايشة .. العب واجرى واروح المدرسة
واجرى بعجلتى واسابق الريح واتنطط فى الشارع العب اولى واستغمايه..
انا وحشتنى برائتى
مليت اوى من حساب الايام اللى عدت او اللى لسه هتيجى
.. مليت من الخصام والزعل
.مليت من اللى الهم مليت من الغم
مليت من الدموع اللى ماليه قلبى قبل عينى...
عايزة اعيش من غير سبب من غير هدف
عايزة اما اصلى اقول يارب خلى بابا وماما وادي لبابا فلوس عشان يفسحنى ويجبلى اللعب الحلوة
لكن دلوقتى اما بصلى بقولك ليه؟
وبسالك ازاى؟
انا عايزة ارجع مفكرش..
. عايزه اعرف اشكرك بجد
عايزة اضحك بجد .
..ياريتنى ما فهمت الدنيا
يارتنى فضلت طفله
26/9/2009
ليست هناك تعليقات:
إرسال تعليق